गणेशोत्सवाच्या कालावधीत शहरातील विविध भागांत नागरिकांची मोठ्या प्रमाणात वर्दळ राहणार असल्याने प्रमुख रस्ते, गणेशोत्सवाच्या मिरवणुकीचे संभाव्य मार्ग तसेच वाहतुकीच्या दृष्टीने महत्त्वाच्या रस्त्यांना प्राधान्य देऊन रस्ते दुरुस्तीची कामे हाती घेण्यात आली आहेत. महाकाली मंदिर मार्ग, जयंत टॉकीज, शिवाजी महाराज चौक ते संताजी भवन, भानापेठ, श्री टॉकीज, अंचलेश्वर गेट ते महाकाली मंदिर रोड मुख्य रस्ता यासह शहरातील विविध प्रमुख मार्गांवरील खड्डे बुजविण्याचे काम महानगरपालिकेच्या संबंधित विभागामार्फत युद्धपातळीवर सुरू आहे.
गणेशोत्सवादरम्यान नागरिक, भाविक तसेच गणेश मंडळांच्या मिरवणुकांमुळे शहरातील वाहतुकीवर वाढता ताण निर्माण होण्याची शक्यता लक्षात घेऊन रस्त्यांची सुरक्षितता, वाहतूक सुरळीतता आणि नागरिकांना होणारा त्रास कमी करण्याच्या दृष्टीने महानगरपालिका प्रशासनाकडून आवश्यक त्या उपाययोजना करण्यात येत आहेत.
शहरातील काही प्रमुख रस्ते भारतीय राष्ट्रीय महामार्ग प्राधिकरण (NHAI) तसेच सार्वजनिक बांधकाम विभागामार्फत बांधण्यात आलेले आहेत. सदर रस्त्यांच्या देखभाल व दुरुस्तीबाबत आवश्यक त्या कार्यवाहीसाठी महानगरपालिकेच्या स्तरावरून संबंधित विभागांकडे सातत्याने पाठपुरावा करण्यात येत आहेत.
शहरातील कोणत्याही रस्त्यावर खड्डे आढळून आल्यास अथवा खड्डे बुजविण्याबाबत कोणतीही तक्रार किंवा सूचना असल्यास नागरिकांनी महानगरपालिकेच्या टोल-फ्री क्रमांकावर संपर्क साधून संबंधित ठिकाणाची माहिती प्रशासनास द्यावी.
‘सुरक्षित रस्ते, सुरळीत वाहतूक आणि खड्डेमुक्त चंद्रपूर’ या उद्देशाने महानगरपालिका प्रशासनामार्फत करण्यात येत असलेल्या उपाययोजनांना नागरिकांनी सहकार्य करावे. आपल्या परिसरातील रस्त्यांवरील खड्ड्यांची माहिती तातडीने महानगरपालिका प्रशासनास देऊन गणेशोत्सव सुरक्षित, सुव्यवस्थित व निर्विघ्नपणे पार पाडण्यासाठी सहकार्य करावे, असे आवाहन चंद्रपूर शहर महानगरपालिकेच्या वतीने करण्यात आले आहे.
